الدراسة في أمريكا :سلبياتها و اجابياتها

 

البوست ده هيكون بيتكلم عن نقطتين بس عشان ميبقاش البوست تقيل عليك لو انت لسة بادئ فى الموضوع ده و تبقى متحمس فى الاول 🙂 :

اسباب اختيار الولايات المتحدة الأمريكية كوجهة للدراسة

ايجابيات و سلبيات الدراسة فى الولايات المتحدة الأمريكية

ليه ادرس فى امريكا؟

- اول حاجة بغض النظر عن المكان اللى انت عايش فيه فأكيد مش هتقدر تنكر ان الجامعات فى امريكا من افضل الجامعات فى العالم ان لم تكن الافضل فى نظرى و ده يرجع لكذا سبب:

- الجودة الاكاديمية و ده سواء من الfaculty ( العاملين بالجامعة من أساتذة جامعة او غيره ) او الresources المتاحة داخل الحرم الجامعى.

- التركيز على الطالب من قبل الprofessors و ان العلاقة مش بتقتصر على طالب و professor فى الclass وبس لا عادى ينفع يكون الطلاب و الprofessors صحاب و يشتغلوا مع بعض فممكن فيوم تلاقى الprofessor بيعزمك على عشا فى بيته🙂

- اللغة: اكيد دايما لما بتدور على بلد تدرس فيها بتبقى عايز لغة سهلة و على الاقل عندك فكرة عنها فاظن اللغة الانجليزية افضل اختيار بجانب لغتك الأم.

- الDiversity ( التنوع ) فهتقابل ناس من كل حتة فى العالم و من كل الثقافات و الأديان و دى فرصتك عشان تتعرف على ناس و تكون شبكة حوالين العالم و دى هنتكلم عنها شوية كدا

- الFlexibilty: اول حاجة انت لما بتيجى تقدم على الجامعات انت مش بتختار التخصص على طول انت بتخش الجامعة الاول بعد كده تقدر تختار التخصص لحد الترم التانى من السنة التانية عشان تبقى عندك الفرصة انك تجرب حاجات كتير و منبقاش محكومين بحاجة واحدة و مش كده و بس و تقدر كمان تاخد كذا تخصص مع بعض فى نفس الوقت Double major, Triple Major او تقدر تاخد تخصص عام و تخصص مصغر Major + Minor او تقدر تاخد تخصص عام و 2 تخصص مصغر Major + Double Minor ، اظن فهمت الفكرة، تقدر كمان تاخد Classes فى مواد ملهاش علاقة بالتخصص بتاعك خالص لو احنا حابين حاجة معينة اوى و عايزين نحضر فيها و خلاص و مناخدش عليها Credit.

- الNetworking: فاكرين لما كنا بنتكلم عن الDiversity من شوية؟ دى بقى مرتبطة بيها و دى معناها انك هتكون علاقات مع ناس مختلفة من كل حتة او جوا امريكا نفسها و ده بيساعد بعدين سواء فى ايجاد فرص العمل او لو انت حابب تعملى StartUp و محتاج شركاء و كمان تكون دائرة أصدقاء يعتمد عليها فى المستقبل.

- اهم و افضل ميزة هى الFinancial aid ( الدعم المالى ): انت عندك فرصة انك تقدم على دعم مالى او منح لاكتر من 80 جامعة فى امريكا واللى هم فى نفس الوقت افضل الجامعات فى العالم اللى تقدر تدرس فيها فممكن حرفيا تدرس مجانا لو الوضع المالى بيسمح بكدة او تدفع مبلغ بسيط.

ايجابيات و سلبيات الدراسة فى الولايات المتحدة الامريكية:

فى الجزء الخاص بالاجابة على سؤال ليه ادرس فى امريكا يعتبر الى حد ما غطينا جزء الايجابيات طب بالنسبة للسلبيات؟

الصراحة جزء السلبيات ده بالذات ممكن يختلف من شخص للاخر لان كل واحد ليه تجربته الخاصة بس ممكن اقول كام نقطة بناء على تجارب الناس المختلفة و لازم أكد ان النقط دى تجارب الناس الشخصية و ممكن متبقاش حاجة سلبية ليك من الأساس:

-الCulture Shock: وده من اسمها "الصدمة الثقافية" و دى بتحصل لما بتسافر مكان جديد غير اللى انت كنت فيه طول حياتك فى احتمال كبير انك تواجه حاجة زى دى لان بطبيعة الحال اى مكان جديد مش شرط يكون موازى للبيئة اللى انت كنت عايش فيها فهتشوف حاجات كتيرة و مختلفة عن اللى انت اختبرتيها قبل كده

- Home sickness: و ده بيحصل لانك بتبعد عن اهلك لمكان جديد و فى نفس الوقت ممكن تكون اول مرة ليك تعيش برة البيت لمدة طويلة فالموضوع ممكن يبقى صعب جدا فى الاول خاصة انك باحتمال كبير ممكن تكون لوحدك تماما لان مش شرط تكون اصدقاء من اول يوم يعنى

- مش سهل انك تاخد فلوس او تتقبل من الاساس فى حالة انك بتقدم على جامعة competitive: خلينا واقعيين لو انت محتاج فلوس ففى نفس الوقت هتضطر انك تقدم على جامعات هى already تنافسية و اللى بتتراوح نسبة القبول فيها من اقل من 1% لحد فوق ال30% و ده من قبل ما تطلب فلوس كمان فلما بتطلب فلوس النسب دى بنتزل اكتر و ده هنتكلم عنه بالتفصيل اكتر فى بوست الدعم مالى ان شاء الله بس لدلوقتى اقدر اقولك على اسماء الخمس جامعات اللى طلب الدعم المالى فيها مش بيأثر على نسب القبول:

the Massachusetts Institute of Technology (MIT), Harvard University, Princeton University, Yale University, and Amherst College

طبعا باقى ال80 جامعة بيدوا فلوس و كويسة جدا كمان بس طلب الدعم المالى بيأثر على نسب القبول طبعا.

ارجوك منيأسش من اخر فقرة دى .. فى ناس كتيرة اوى غيرك قدرت تعملها يبقى انت تقدر/ى 🙂